ಬಿಜೆಪಿ ಹೈಕಮಾಂಡ್ ರಾಜ್ಯ ರಾಜಕಾರಣ ಹಾಗೂ ಮುಂಬರುವ ವಿಧಾನ ಸಭೆ ಚುನಾವಣೆಯನ್ನು ಯಡಿಯೂರಪ್ಪ ಕೇಂದ್ರಿತವಾಗಿಸಲು ಪ್ರಯತ್ನಿಸುತ್ತಿದೆ. ಈ ಬೆಳವಣಿಗೆಯ ನಡುವೆಯೇ ರಾಜ್ಯ ಬಿಜೆಪಿಯಲ್ಲಿ ಯಡಿಯೂರಪ್ಪ ಕುಟುಂಬದ ವಿರುದ್ಧ ಅಸಮಾಧಾನದ ಹೊಗೆಯೊಂದು ದಟ್ಟವಾಗುತ್ತಿದೆ. ಬಿಜೆಪಿಯ ರಾಜ್ಯನಾಯಕರ ಈ ಅನಪೇಕ್ಷಿತ ನಡವಳಿಕೆ ಬಿಜೆಪಿಯ ರಾಷ್ಟ್ರೀಯ ಮುಖಂಡರನ್ನು ಕಂಗೆಡಿಸಿದೆ.
ರಾಜ್ಯ ಬಿಜೆಪಿಯ ಶಕ್ತಿಯಾಗಿದ್ದ ಯಡಿಯೂರಪ್ಪ ಅವರಿಗೇ ಭೇಟಿಗೆ ಸಮಯ ನೀಡದೆ ವಾಪಸ್ ಕಳಿಸಿದ್ದ ಅಮಿತ್ ಶಾ ಅವರು ಈಗ ಸೋಮಣ್ಣ ಅವರಂತಹ ನಾಯಕರನ್ನು ಕರೆದು ಮಾತನಾಡಿಸುತ್ತಿದ್ದಾರೆ. ನಾಯಕರ ಭೇಟಿಯ ಬಳಿಕವೂ ಸೋಮಣ್ಣ ಅವರು ಯಡಿಯೂರಪ್ಪ ಮತ್ತು ಅವರ ಪುತ್ರ ವಿಜಯೇಂದ್ರ ವಿರುದ್ಧ ಮಾತನಾಡುತ್ತಿರುವುದನ್ನು ನೋಡಿದರೆ, ಯಡಿಯೂರಪ್ಪ ಅವರನ್ನು ನೇಪಥ್ಯಕ್ಕೆ ಸರಿಸುವ ಕೆಲಸ ನಡೆಯುತ್ತಿದೆ ಎಂಬ ಅನುಮಾನ ಕಾಡುತ್ತಿದೆ.
ವ್ಯವಸ್ಥಿತ ಕುತಂತ್ರ:
ರಾಜ್ಯ ಬಿಜೆಪಿಯಲ್ಲಿ ಮಹಾನ್ ಶಕ್ತಿಯಾಗಿ ಬೆಳೆದಿದ್ದ ಯಡಿಯೂರಪ್ಪರ ಹಾದಿ ಸುಲಭದ ಪಯಣವಾಗಿರಲಿಲ್ಲ. ಹಿತಶತ್ರುಗಳ ದಂಡೇ ಇದ್ದರೂ, ಜಾತಿಯ ಬಲ ಮತ್ತು ಹೋರಾಟದ ಕಿಚ್ಚಿನಿಂದಾಗಿ ಅವರು ಎಲ್ಲರನ್ನೂ ಮೀರಿದ್ದರು. ಹಿಂದೆಯೂ ಅವರಿಗೆ ಹಲವು ಮಂದಿ ಅಡ್ಡಗಾಲು ಹಾಕಿದ್ದರು. ಆ ಹರ್ಡಲ್ಸ್‌ಗಳನ್ನು ದಾಟಿ ಅಧಿಕಾರ ಹಿಡಿದ ಯಡಿಯೂರಪ್ಪರ ಆಪ್ತ ಬಳಗ ಮಾಡಿದ ಎಡವಟ್ಟುಗಳು ಅವರನ್ನು ಮುಖ್ಯಮಂತ್ರಿಯ ಖುರ್ಚಿಯಿಂದ ಒತ್ತಾಯವಾಗಿ ಇಳಿಸಲು ಮತ್ತು ಜೈಲಿಗೆ ಕಳಿಸುವಂತಾಯಿತು ಎಂಬುದು ರಾಜಕೀಯದ ದುರಂತ.
ಜೈಲಿಗೆ ಹೋಗಿ ಬಂದ ಅಪಕೀರ್ತಿಯ ನಡುವೆಯೂ ತಮ್ಮ ಸಂಘಟನಾ ಚತುರತೆಯಿಂದ ಬಿಜೆಪಿಯನ್ನು ಅಧಿಕಾರಕ್ಕೆ ತಂದ ಯಡಿಯೂರಪ್ಪ ಅವರನ್ನು ಎರಡನೇ ಅವಧಿಯಲ್ಲಿಯೂ ಪೂರ್ಣ ಅಧಿಕಾರ ನಡೆಸಲು ಬಿಡಲಿಲ್ಲ. ಆದರೆ ಈಗ ರಾಜ್ಯದಲ್ಲಿ ಮತ್ತೆ ಅಧಿಕಾರಕ್ಕೆ ಬರಲು ಬಿಜೆಪಿಯ ಹೈಕಮಾಂಡ್, ಯಡಿಯೂರಪ್ಪರಿಗೇ ಶರಣಾಗಿದೆ.
ಸಿ.ಟಿ.ರವಿ ಹೇಳಿಕೆ ಹಿಂದಿರುವ ಶಕ್ತಿ ಯಾವುದು?
ತಮ್ಮ ಉತ್ತರಾಧಿಕಾರಿ ವಿಜಯೇಂದ್ರ ಎಂದು ಶಿಕಾರಿಪುರ ಕ್ಷೇತ್ರಕ್ಕೆ ಸೀಮಿತವಾಗಿ ಮಾತನಾಡಿದ್ದ ಯಡಿಯೂರಪ್ಪ ಅವರನ್ನು ಉಲ್ಲೇಖಿಸಿ ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸಿ.ಟಿ.ರವಿ ನೀಡಿರುವ ಹೇಳಿಕೆ ಹಲವು ಅನುಮಾನಗಳನ್ನು ಹುಟ್ಟುಹಾಕಿದೆ. ಒಂದು ಕಾಲದಲ್ಲಿ ಯಡಿಯೂರಪ್ಪ ಅವರ ಮುಂದೆ ನಿಂತು ಮಾತನಾಡಲು ಅಂಜುತಿದ್ದ ರವಿ, ಬಿಜೆಪಿಯ ಟಿಕೆಟ್ ಯಾರ ಮನೆಯ ಕಿಚನ್‌ನಲ್ಲಿ ಅಪ್ಪ ಮಕ್ಕಳು ಕುಳಿತು ನಿರ್ಧರಿಸುವ ಸಂಗತಿಯಲ್ಲ ಎಂದಿದ್ದಾರೆ. ಈ ಹೇಳಿಕೆ ಬಿಜೆಪಿಯಲ್ಲಿನ ಯಡಿಯೂರಪ್ಪ ವಿರೋಧಿಗಳ “ಸಾಂಘಿಕ” ಧ್ವನಿಯಂತೆ ಭಾಸವಾಗುತ್ತಿರುವುದರಲ್ಲಿ ಯಾವುದೇ ಅನುಮಾನವಿಲ್ಲ.
ಅಸಂತೋಷ ಇಂದು, ನಿನ್ನೆಯದಲ್ಲ:
ಬಿಜೆಪಿಯ ಒಂದು ವಲಯ ಯಡಿಯೂರಪ್ಪ ಅವರನ್ನು ಮೊದಲಿಂದಲೂ ವಿರೊಧಿಸುತ್ತಲೇ ಬಂದಿತ್ತು. ಮಾಜಿ ಕೇಂದ್ರ ಸಚಿವ ಅನಂತ್‌ಕುಮರ್ ಅವರ ಕಾಲದಿಂದಲೂ ಇದು ಚಾಲ್ತಿಯಲ್ಲಿತ್ತು. ಅನಂತ್ ಕುಮಾರ್ ಅವರು ದೆಹಲಿ ಮಟ್ಟದಲ್ಲಿ ಯಡಿಯೂರಪ್ಪ ಅವರ ಪ್ರಭಾವವನ್ನು ಯಾವತ್ತೂ ಏರಲು ಬಿಟ್ಟಿರಲಿಲ್ಲ ಎಂಬುದು ಎಲ್ಲರಿಗೂ ಗೊತ್ತಿದ್ದ ಸಂಗತಿಯಾಗಿತ್ತು. ಈಗ ಅನಂತ್‌ಕುಮಾರ್ ಜಾಗದಲ್ಲಿ ಬಿ.ಎಲ್.ಸಂತೋಷ್ ಇದ್ದಾರೆ. ಮುಖ್ಯಮಂತ್ರಿಯಾಗಿದ್ದ ಅವಧಿಯಲ್ಲಿಯೂ ಬಿಎಸ್‌ವೈಗೆ ಮೂಗುದಾರ ಹಾಕುವ ಕೆಲಸವನ್ನು ಅವರು ಮಾಡುತ್ತಲೇ ಇದ್ದರು. ಯಡಿಯೂರಪ್ಪ ಅವರಿಗಿರುವ ಸಮೂಹ ನಾಯಕತ್ವ ಮತ್ತು ಜಾತಿಯ ಬಲದ ಕಾರಣಕ್ಕೆ ಅದು ಪರಿಣಾಮಕಾರಿಯಾಗಿರಲಿಲ್ಲ.
ಅನಂತ್‌ಕುಮಾರ್ ಬಳಗ ಹಿಂದೆಯೂ ಲಿಂಗಾಯತ ಮುಖಂಡ ಬಿ.ಬಿ.ಶಿವಪ್ಪ ಅವರನ್ನು ಯಡಿಯೂರಪ್ಪ ವಿರುದ್ಧ ಎತ್ತಿಕಟ್ಟಿತ್ತು. ಕೆ.ಎಸ್.ಈಶ್ವರಪ್ಪ, ಸಿ.ಟಿ.ರವಿ ಸೇರಿದಂತೆ ಹಲವು ಅನಂತಕುಮಾರ್ ಪ್ರೇಷಿತರು ತಂತ್ರಗಾರಿಕೆ, ಟೀಕೆ ಟಿಪ್ಪಣಿ ಮಾಡಿದವರೇ ಎಂಬುದು ರಾಜಕಾರಣ ಬಲ್ಲವರಿಗೆ ಗೊತ್ತು. ಈಗ ಅನಂತಕುಮಾರ್ ಜಾಗದಲ್ಲಿರುವ ಸಂತೋಷ್‌ಜೀಗೆ ಸಿ.ಟಿ.ರವಿ ಅತ್ಯಾಪ್ತರು. ಅವರ ಬೆಂಬಲವಿಲ್ಲದೆ ಚುನಾವಣೆ ಹೊತ್ತಲ್ಲಿ ಯಡಿಯೂರಪ್ಪ ವಿರುದ್ಧ ಯಾವ ಹೇಳಿಕೆಗಳೂ ಬರುವುದಿಲ್ಲ ಎಂಬುದು ಸ್ಪಷ್ಟ.
ಯಡಿಯೂರಪ್ಪ ವಿರುದ್ಧ ಬಸನಗೌಡ ಪಾಟೀಲ್ ಯತ್ನಾಳ್ ಮಾಡುತ್ತಿರುವ ಆರೋಪಗಳ ಹಿಂದೆಯೂ ಇದೇ ಗ್ಯಾಂಗ್‌ನ ಪಿತೂರಿಯಿರುವುದನ್ನು ಅಲ್ಲಗಳೆಯಲಾಗದು. ಹಾದಿ ಬೀದಿಯಲ್ಲಿ ಯಡಿಯೂರಪ್ಪ ಮತ್ತವರ ಮಕ್ಕಳ ವಿರುದ್ಧ ಯತ್ನಾಳ್ ಮಾತನಾಡಿದರೂ, ಅವರ ವಿರುದ್ಧ ಯಾವುದೇ ಗಂಭೀರವಾದ ಶಿಸ್ತುಕ್ರಮ ಜರುಗಲಿಲ್ಲ ಎಂಬುದೇ ಈ ಎಲ್ಲಾ ಷಡ್ಯಂತ್ರಕ್ಕೆ ಪುರಾವೆಗಳನ್ನು ನೀಡುತ್ತದೆ.
ವಿಜಯೇಂದ್ರ ವಿರುದ್ಧ ಸಮರ ಯಾಕೆ ?
ಯಡಿಯೂರಪ್ಪ ಅವರು ಅಧಿಕಾರದಲ್ಲಿ ಇರುವ ತನಕ ಅವರ ಸುತ್ತ ಸರ್ಪಗಾವಲು ಹಾಕಿ ಮುಖ್ಯಮಂತ್ರಿ ಕಚೇರಿಯನ್ನು ನಿಯಂತ್ರಿಸಿದ್ದು ಅವರ ಪುತ್ರ ವಿಜಯೇಂದ್ರ ಎಂಬುದು ಎಲ್ಲರಿಗೂ ಗೊತ್ತಿರುವ ಸತ್ಯ. ಮೊದಲ ಬಾರಿ ಮುಖ್ಯಮಂತ್ರಿಯಾಗಿದ್ದ ಅವಧಿಯಲ್ಲಿ ಅವರು ಜೈಲಿಗೆ ಹೋಗುವ ಪ್ರಸಂಗ ಬಂದಿದ್ದೂ ಕುಟುಂಬದವರ ಕಾರಣಕ್ಕೆ ಎನ್ನಲಾಗುತ್ತಿದೆ. ಅಧಿಕಾರಕ್ಕೆ ಬಂದ ಬಳಿಕ ಯಡಿಯೂರಪ್ಪ ಅವರು ಅತಿಯಾದ ಕುಟುಂಬ ಪ್ರೇಮ ತೋರಿದರು. ಆಪರೇಷನ್ ಕಮಲ, ಉಪಚುನಾವಣೆ ಸಂದರ್ಭ ವಿಜಯೇಂದ್ರ ಅವರನ್ನು ರಾಜ್ಯ ಬಿಜೆಪಿಯ ಚಾಣಕ್ಯ ಎಂಬಂತೆ ಬಿಂಬಿಸಲಾಯಿತು. ಈ ಬೆಳವಣಿಗೆಗಳು ಬಿಜೆಪಿಯ ಎರಡನೇ ಹಂತದ ನಾಯಕರ ಹೊಟ್ಟೆಯಲ್ಲಿ ಅಸಿಡಿಟಿ ಹೆಚ್ಚಿಸಿದೆ. ಈಗ ಬಿಜೆಪಿಯಲ್ಲಿರುವ ಲಿಂಗಾಯತರೆಲ್ಲ ಯಡಿಯೂರಪ್ಪ ಆಗಲು ಸಾಧ್ಯವಿಲ್ಲ ಎಂಬುದು ನಿಜವಾದರೂ, ಅವರ ಪುತ್ರ ವಿಜಯೇಂದ್ರ ಅವರನ್ನು ಕಟ್ಟಿಹಾಕಲೇ ಬೇಕೆಂಬುದು ಬಿಜೆಪಿಯ ಕೆಲವರ ಸಂಘಟಿತ ಪ್ರಯತ್ನವಾಗಿದೆ. ಒಂದು ಬಾರಿ ಶಾಸಕರೂ ಆಗದ ಅವರನ್ನು ಭಾವಿ ಮುಖ್ಯಮಂತ್ರಿ ಎಂಬಂತೆ ಬಿಂಬಿಸಲಾಗುತ್ತಿದೆ, ವೀರಶೈವ ಸಮಾಜ ಪ್ರತಿನಿಧಿಸುವ ವಿಜಯೇಂದ್ರ ಅವರನ್ನು ಹೀಗೆಯೇ ಬೆಳೆಯಲು ಬಿಟ್ಟರೆ, ಸಿ.ಟಿ.ರವಿ ಸೇರಿದಂತೆ ಅವರ ತಲೆಮಾರಿನ ಕೆಲ ನಾಯಕರುಗಳ ಭವಿತವ್ಯದ ಕನಸುಗಳು ಮಸುಕಾಗುವ ಲಕ್ಷಣಗಳಿವೆ. ಈ ಕಾರಣದಿಂದಲೇ ಬಿಜೆಪಿಯ ಒಂದು ಸಮೂಹ ಯಡಿಯೂರಪ್ಪ ಬ್ರಿಗೇಡ್ ವಿರುದ್ಧ ಸಂಘಟಿತ ಹೋರಾಟಕ್ಕೆ ನಿಂತಿದೆ.
ವಿಜಯೇಂದ್ರ ಎಡವಟ್ಟು:
ರಾಜ್ಯದಲ್ಲಿ ಬಿಜೆಪಿ ಒಂದು ಬಾರಿಯೂ ಸಂಪೂರ್ಣ ಬಹುಮತದಿಂದ ಅಧಿಕಾರ ಹಿಡಿದಿಲ್ಲ. ಆಪರೇಷನ್ ಕಮಲ ಎಂಬ ಪೊಲಿಟಿಕಲ್ ಅಬಾರ್ಶನ್ ಮೂಲಕ ರಾಜ್ಯ ರಾಜಕೀಯವನ್ನು ಕಲುಷಿತಗೊಳಿಸಿದ ಹಲವು ಪಾಲುದಾರರಲ್ಲಿ ವಿಜಯೇಂದ್ರ ಕೂಡಾ ಒಬ್ಬರು. ಅಧಿಕಾರ ಇರುವಾಗ ಯಾರ ಕೆಲಸಗಳನ್ನೂ “ಸಲೀಸಾಗಿ’ ಮಾಡಿಕೊಳ್ಳಲು ಇವರು ಬಿಡುತ್ತಿರಲಿಲ್ಲ. ಸರಕಾರದಲ್ಲಿ ಏನೇ ಆಗಬೇಕಿದ್ದರೂ ವಿಜಯೇಂದ್ರ ಅವರ “ಸಮ್ಮತಿ’ ಇರಲೇ ಬೇಕಾಗಿತ್ತು. ಇಷ್ಟು ಮಾತ್ರವಲ್ಲದೆ, ಪಕ್ಷದಲ್ಲಿ ದುಡಿದ ಹಿರಿಯ ನಾಯಕರ್‍ನೂ ಏಕವಚನದಲ್ಲಿಯೇ ಮಾತನಾಡಿಸುತ್ತಿದ್ದರು. ಯಾವ ಪಕ್ಷದ ಹಂಗಿಲ್ಲದೆ ಗೆದ್ದು ಬರುವ ಸಾಮರ್ಥ್ಯ ಇರುವ ಸೋಮಣ್ಣರಂತಹವರನ್ನು ಕೆಟ್ಟದಾಗಿ ನಡೆಸಿಕೊಂಡಿದ್ದರು. ತಮಗಿರುವ ಆರ್ಥಿಕ ಬಲದಿಂದಲೇ ಎಲ್ಲವನ್ನೂ ನಿಯಂತ್ರಿಸಬಹುದು ಎಂಬ ಭಾವನೆ ವಿಜಯೇಂದ್ರ ಅವರಿಗಿದೆ ಎಂಬ ಆರೋಪ ಪಕ್ಷದ ಅನೇಕರಲ್ಲಿದೆ. ಅಧಿಕಾರದ ಪರಿಧಿಯಲ್ಲಿರುವಾಗ ಮಾಡಿದ ಎಡವಟ್ಟುಗಳ ಅಸ್ತ್ರಗಳನ್ನು ಹಿಡಿದುಕೊಂಡಿರುವ ಬಿ.ಎಲ್.ಸಂತೋಷ್ ಶಿಷ್ಯವರ್ಗ ಈಗ ವಿಜಯೇಂದ್ರ ವಿರುದ್ಧ ತಿರುಗಿಬಿದ್ದಿದೆ.
ಒಂದು ಕಡೆ ಬಿಜೆಪಿ ಹೈಕಮಾಂಡ್‌ಗೆ ಅಂದು ಬೇಡವಾಗಿದ್ದ ಯಡಿಯೂರಪ್ಪ ಈಗ ಬೇಕಾಗಿದ್ದಾರೆ. ಇನ್ನೊಂದು ಕಡೆ ರಾಜ್ಯ ಬಿಜೆಪಿಯ ನಾಯಕರುಗಳು ವೀರಶೈವರ ಮತ ಬೇಕು ಯಡಿಯೂರಪ್ಪ ಕುಟುಂಬಕ್ಕೆ ಅಧಿಕಾರ ಬೇಡ ಎಂಬ ಧೋರಣೆಯಲ್ಲಿದ್ದಾರೆ. ಸೋಮಣ್ಣ ಅಸಮಾಧಾನ, ಸಿ.ಟಿ.ರವಿಯವರ ಕಿಚನ್ ಪಾಲಿಟಿಕ್ಸ್‌ಗಳು ಯಡಿಯೂರಪ್ಪ ಅವರನ್ನು ನೇಪಥ್ಯಕ್ಕೆ ಸರಿಸುವ ತಂತ್ರಗಾರಿಕೆಯ ಭಾಗ ಎಂದು ಯಡಿಯೂರಪ್ಪ ಅಭಿಮಾನಿಗಳ ಆರೋಪವಾಗಿದೆ.
