ಶಿವಮೊಗ್ಗ: ಬೇಲಿ ಕಳ್ಳಿ ಬೀಜ ತಿಂದು ೧೨ ಮಕ್ಕಳು ಅಸ್ವಸ್ಥಗೊಂಡು ಮೆಗ್ಗಾನ್‌ ಆಸ್ಪತ್ರೆಗೆ ದಾಖಲಾಗಿದ್ದು, ಸೂಕ್ತ ಚಿಕಿತ್ಸೆ ಬಳಿಕ ಮಕ್ಕಳು ಆರೋಗ್ಯದಲ್ಲಿ ಚೇತರಿಕೆ ಕಂಡಿದೆ. ಭದ್ರಾವತಿ ತಾಲೂಕು ಸಂಜೀವಿನಿ ನಗರದ ೮ ಹಾಗೂ ಶಿಕಾರಿಪುರ ತಾಲೂಕು ಹೆರಿಗೆ ಗ್ರಾಮಗದ ೪ ಮಕ್ಕಳು ಭಾನುವಾರ ರಾತ್ರಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಮಕ್ಕಳು ತಮ್ಮ ಊರಿನಲ್ಲಿ ಬೇಲಿಕಳ್ಳಿ ಗಿಡದ(ಜತ್ರೋಪ) ಬೀಜವನ್ನು ಸೇವಿಸಿದ್ದರಿಂದ ವಾಂತಿ ಬೇದಿ ಮಾಡಿಕೊಂಡು ಬಳಲಿದ್ದರು. ತಕ್ಷಣ ಪೋಷಕರು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಎಲ್ಲರೂ ೮ ರಿಂದ ೧೨ ವರ್ಷದ ಮಕ್ಕಳಾಗಿದ್ದಾರೆ. ಚಿಕಿತ್ಸೆ ಬಳಿಕ ಎಲ್ಲರೂ ಚೇತರಿಸಿಕೊಂಡಿದ್ದಾರೆ.
ಬೇರೆ ಬೇರೆ ಭಾಗದ ಮಕ್ಕಳು ಒಂದೇ ಕಾರಣಕ್ಕೆ ಅಸ್ಪಸ್ಥರಾಗಿದ್ದಾರೆ. ಮಕ್ಕಳು ಅರಿವಿಲ್ಲದೆ ಕಳ್ಳಿ ಬೇಲಿ ಗಿಡದ ಬೀಜ ಸೇವಿಸಿದ್ದಾರೆ. ಈ ಬೀಜದಲ್ಲಿ ವಿಷಕಾರಿ ಅಂಶವಿದ್ದು, ವಾಂತಿಬೇಧಿ ಜತೆ ಉಸಿರಾಟದ ತೊಂದರೆಯೂ ಆಗಬಹುದು. ಸಕಾಲಕ್ಕೆ ಚಿಕಿತ್ಸೆ ಸಿಗದೆ ಸಾವುನೋವುಗಳು ಸಂಭವಿಸಿದ ಉದಾಹರಣೆಗಳೂ ಇವೆ. ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಎಲ್ಲಾ ಮಕ್ಕಳು ಚೇತರಿಸಿಕೊಂಡಿದ್ದಾರೆ.
ಡಾ, ತಿಮ್ಮಪ್ಪ , ವೈದ್ಯಕೀಯ ಅಧೀಕ್ಷಕರು
ಮೆಗ್ಗಾನ್‌ ಬೋಧನಾ ಆಸ್ಪತ್ರೆ
