ಶಿವಮೊಗ್ಗ ನಗರದಲ್ಲಿ ರೈಲು, ವಿಮಾನ ಸಹಿತ ಎಲ್ಲಾ ಮೂಲಸೌಕರ್‍ಯಗಳಿದ್ದರೂ ಕೈಗಾರಿಕೆಗಳು ಬರುತ್ತಿಲ್ಲ, ನಮ್ಮ ಮಕ್ಕಳಿಗೆ ಉದ್ಯೋಗವಿಲ್ಲ. ನಿರುದ್ಯೋಗ ಸಮಸ್ಯೆ, ಶಿವಮೊಗ್ಗ ನಗರವನ್ನು ಸುರಕ್ಷಿತ ನಗರವನ್ನಾಗಿ ಮಾಡಲು ಪ್ರಥಮ ಆದ್ಯತೆ ನೀಡುವುದಾಗಿ ವಿಧಾನಸಭಾ ಕ್ಷೇತ್ರದ ಜೆಡಿಎಸ್ ಅಭ್ಯರ್ಥಿ ಆಯನೂರು ಮಂಜುನಾಥ ಹೇಳಿದರು.
ಪತ್ರಿಕಾ ಭವನದಲ್ಲಿ ಶನಿವಾರ ಆಯೋಜಿಸಿದ್ದ ಪತ್ರಿಕಾ ಸಂವಾದದಲ್ಲಿ ಅವರು ಮಾತನಾಡಿದರು. ನನಗೆ ಶಾಸಕ ಸ್ಥಾನ ಹೊಸದಲ್ಲ, ಲೋಕಸಭೆ ರಾಜ್ಯಸಭೆ, ವಿಧಾನಪರಿಷತ್ ಸದನದ ಮನೆಗಳಲ್ಲಿ ಕೆಲಸ ಮಾಡಿದ್ದೇನೆ. ಅಗತ್ಯ ಬಿದ್ದಾಗ ಆಡಳಿತ ಪಕ್ಷದಲ್ಲಿದ್ದರೂ ಸಹ ಕಾರ್ಮಿಕರ ಸಮಸ್ಯೆ ಮತ್ತು ಸಾರ್ವಜನಿಕರ ಸಮಸ್ಯೆಗಳ ಬಗ್ಗೆ ಸದನದಲ್ಲಿ ಮಂಡಿಸಿದ್ದೇನೆ. ಸರ್ಕಾರವನ್ನು ಎಚ್ಚರಿಸುವ ಪ್ರಯತ್ನ ಮಾಡಿ ಗಮನ ಸೆಳೆದಿದ್ದೆನೆ ಎಂದರು.
ಶಿವಮೊಗ್ಗದಲ್ಲಿ ಸ್ಮಾರ್ಟ್ ಸಿಟಿ ಯೋಜನೆ ಸರಿಯಾಗಿಲ್ಲ. ಕಳಪೆಯಾಗಿದೆ. ಅಗೆಯುವುದೇ ಒಂದು ದೊಡ್ಡ ಕಾಮಗಾರಿಯಾಗಿದೆ. ಭ್ರಷ್ಟಾಚಾರ ತಾಂಡವವಾಡಿದೆ. ಈ ಯೋಜನೆಯಲ್ಲಿ ಜನತಾ ಪ್ರಾತಿನಿಧ್ಯವಿಲ್ಲ. ಹಾಗಾಗಿಯೇ ಅದರ ಹೆಸರು ಕೆಡುತ್ತಿದೆ. ಪ್ರತಿ ವಾರ್ಡ್‌ನಲ್ಲಿ ಕಾರ್ಪೊರೇಟರ್ ಮುಖ್ಯಸ್ಥನಲ್ಲ. ಆ ವಾರ್ಡಿನ ನಾಗರಿ ಸಮಿತಿಯವರು ಮುಖ್ಯ. ಅವರ ಅಭಿಪ್ರಾಯ ಪಡೆದು ಅಭಿವೃದ್ಧಿ ಕಾರ್ಯ ಮಾಡಬೇಕಿತ್ತು ಎಂದರು.
ಶಿವಮೊಗ್ಗದಲ್ಲಿ ವಾತಾವರಣ ಬದಲಾಗದಿದ್ದರೆ ಬರಡು ಜಿಲ್ಲೆಯಾಗುತ್ತದೆ. ನಗರದಲ್ಲಿ ಶಾಂತಿ ತರಬೇಕು, ಹೊಸ ವಿನ್ಯಾಸ ತರಬೇಕು. ಅಶಾಂತಿ ಉಂಟು ಮಾಡಿದವರ ಮೇಲೆ ವಾಗ್ದಾಳಿ ನಡೆಸಿ ಹೋರಾಟ ಮಾಡಿ ಚುನಾವಣೆಗೆ ಸ್ಪರ್ಧಿಸಿದ್ದೇನೆ. ಶಿವಮೊಗ್ಗದಲ್ಲಿ ಉತ್ತಮವಾದ ಸರ್ಕಾರಿ ಶಾಲೆಗಳನ್ನು ತೆರೆಯುವುದಕ್ಕೆ ಆಗಿಲ್ಲ. ಆದರೆ ಖಾಸಗಿ ಶಾಲೆಗಳು, ಪ್ರತಿವರ್ಷ ಅತ್ಯುತ್ತಮವಾದ ದುಬಾರಿ ಕಾಲೇಜುಗಳು ಪ್ರಾರಂಭವಾಗಿವೆ ಎಂದರು.
ನನ್ನ ಈಗಿನ ವಿಧಾನಸಭೆಯ ಎದುರು ಸ್ಪರ್ದಿಗಳು ತಾವು ಕಾರ್ಪೊರೇಟ್ ರ್ ಆದಾಗ ಮಾಡಿದ ಕಾರ್ಯ ನೋಡಿದಾಗ ಪ್ರಬುದ್ಧತೆ ಕಂಡುಬಂದಿಲ್ಲ. ಬ್ಯಾರಿ ಮಾಲ್‌ನ್ನು ೯೯ ವರ್ಷಕ್ಕೆ ಬರೆದು ಕೊಡುವ ಕೆಲಸವಾಯಿತು. ಕೆಲವು ನಾಯಕರ ಹಪಾಹಪಿತನದಿಂದ ಶಿವಮೊಗ್ಗ ಹಾಳಾಗಿದೆ. ಸುರಕ್ಷಿತ ವಾತಾವರಣ ಇಲ್ಲ ಎಂದರು.
ಪ್ರೆಸ್ ಟ್ರಸ್ಟ್ ಅಧ್ಯಕ್ಷ ಎನ್. ಮಂಜುನಾಥ, ಕಾರ್ಯದರ್ಶಿ ನಾಗರಾಜ ನೇರಿಗೆ, ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಕಾರ್ಯದರ್ಶಿ ಸಂತೋಷ್ ಕಾಚಿನಕಟ್ಟೆ ಉಪಸ್ಥಿತರಿದ್ದರು.
ಇತ್ತೀಚೆಗೆ ರಾಜ್ಯದಲ್ಲಿ ಜಾಗತಿಕ ಬಂಡವಾಳ ಹೂಡಿಕೆದಾರರ ಸಮಾವೇಶ ಆಯಿತು, ಆದರೆ ಉದ್ಯಮಿಗಳು ಇದ್ದರೂ ಯಾರೂ ಶಿವಮೊಗ್ಗದಲ್ಲಿ ಇನ್ವೆಸ್ಟ್ ಮಾಡಲು ಬರಲಿಲ್ಲ. ಉದ್ಯೋಗವಿಲ್ಲದೆ ಯುವಕರು ಪರವೂರಿಗೆ ತೆರಳುತ್ತಿದ್ದಾರೆ. ಇದರಿಂದ ನಗರ ವೃದ್ಧಾಶ್ರಮವಾಗುತ್ತಿದೆ. ಕೋಮುಗಲಭೆಯಿಂದ ಸಾವಿರಾರು ಜನ ಬೀದಿಗೆ ಬಿದ್ದರು. ದಿನನಿತ್ಯ ದುಡಿಯುವವರ ತುತ್ತಿಗೂ ಕಷ್ಟವಾಯಿತು. ಈ ವಾತಾವರಣ ಬದಲಾಯಿಸಬೇಕೆಂದರೆ ಬದಲಾವಣೆ ಮುಖ್ಯ.
ಆಯನೂರು ಮಂಜುನಾಥ
